ಬಾಲ್ಯದಲ್ಲಿ ನನ್ನನ್ನು ಮೊಟ್ಟ ಮೊದಲು ಭಾವಗೀತೆಗಳ ಕಡೆಗೆ ಸೆಳೆದ ಒಂದು ಹಾಡೆಂದರೆ, ಅದೇ ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ದಿವಂಗತ ಶ್ರೀ ದ.ರಾ.ಬೇಂದ್ರೆಯವರ ಪಾತರಗಿತ್ತಿಯ ಹಾಡು ’ಪಾತರಗಿತ್ತಿ ಪಕ್ಕಾ ನೊಡಿದೇನ ಅಕ್ಕಾ...’. ಅದನ್ನ ಮನಮೋಹಕವಾಗಿ ಹಾಡಿ ನಾಡಿನ ಗಮನ ಸೆಳೆದದ್ದು ಶ್ರೀ ಯಶವಂತ ಹಳಿಬಂಡಿಯವರು. ಮೊನ್ನೆ ಅವರು ನಮ್ಮನಗಲಿದರು. ಸುಗಮ ಸಂಗೀತ ಗಾಯಕರೆಂದೇ ಪ್ರಸಿದ್ಧಿ ಪಡೆದ ಯಶವಂತ ಹಳಿಬಂಡಿಯವರ ಆತ್ಮಕ್ಕೆ ಶಾಂತಿ ಸಿಗಲೆಂದು ಕೋರುತ್ತ, ಅವರಿಗಾಗಿ ನನ್ನ ಈ ಹಾಡನ್ನು ಸಮರ್ಪಿಸಿ ಅಂತಿಮ ನಮನಗಳನ್ನು ಸಲ್ಲಿಸುತ್ತಿದ್ದೇನೆ.
ದಾರಿ ಮುಗಿಸಿದ ಬಂಡಿ
---------------------------
ಬಂಡಿ ಬಂದಿತ್ತ ತಂಗಿ ಊರಿಗೆ ಬಂಡಿ ಬಂದಿತ್ತ
ಜನಮನ ಸೆಳೆದಿತ್ತ ತಂಗಿ ಬಂಡಿಯ ಗಾಲಿ ಹರಿದಿತ್ತ
ಆಡಿ ಓಡಿ ಮೋಡಿ ಮಾಡಿ ಮೂಡಿಸಿದ ಗುರುತು ಹೆಚ್ಚಿತ್ತ ತಂಗಿ ದಾರಿ ಸರಿದಿತ್ತ
ಸಾಗಿ ಬಂದಿತ್ತ ತಂಗಿ ಬಂಡಿ ಎತ್ತರ ಏರಿತ್ತ
ಏರುತ ಇಳಿಯುತ ಸಂಜೆಯಾಗಿತ್ತ ತಂಗಿ ಬಂಡಿಗೆ ಇನ್ನೂ ಹಸಿವಿತ್ತ
ತಿರುಗುತ ಕರಗುತ ದಣಿದಿತ್ತ ತಂಗಿ ಗಾಡಿ ಸೋತಿತ್ತ
ಸಂಚು ನಡಿದಿತ್ತ ತಂಗಿ ಬಂಡಿಯ ಕೆಡವಲು ಕಾಲವು ಕಾದಿತ್ತ
ಕೊಂಡಿಯು ಕಳಚಿತ್ತ ತಂಗಿ ಬಂಡಿ ನೆಲಕ್ಕೆ ಉರುಳಿತ್ತ
ಕೇಡನು ಬಯಸದ ಕೀರ್ತಿಯ ಬೇಡದ ಮೂರ್ತಿಯಾಗಿತ್ತ ತಂಗಿ ಬಂಡಿಯು ಗುಡಿಯನು ಸೇರಿತ್ತ
ಎಲ್ಲ ಮುಗಿದಿತ್ತ ತಂಗಿ ಬಂಡಿಯು ಊರಿನ ಯಾತ್ರೆಯ ಮುಗಿಸಿತ್ತ
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ
ಸಹೃದಯಿಗಳೇ, ನೆನಪಿಡಿ, ನಿಮ್ಮ ಅನಿಸಿಕೆ ನನ್ನ ಬರಹಗಳಲ್ಲಿನ ಕೊರತೆಗಳಿಗೊಂದು ಲಸಿಕೆ