ನನ್ನೆಲ್ಲವನು ಆವರಿಸುವ ನಿನ್ನೆಲ್ಲವುಗಳಿಗಾಗಿ ನನ್ನಲ್ಲಿ ಇರುವ ನಿಶ್ಕಲ್ಮಶ ಭಾವದ ದೀವಿಗೆಯಿಂದ ಹೊರಟ ಬೆಳಕು ಕತ್ತಲೆಗಳನ್ನ ಕತ್ತರಿಸಿ ಚಿರಕಾಲ ಪ್ರೇಮದ ಜ್ಯೊತಿಯಾಗಿ ನಿನ್ನೊಳಗುಡಿಯಲಿ ಜೊತೆಯಾಗಿ ಬೆಳಗಲಿ ಎಂಬ ಆಶಯದಲಿ..
ನಿನಗಾಗಿ ನನ್ನಲ್ಲಿ
----------------
ಹಸಿವಿನಿಂದ ಬಂದ ನಿನ್ನ ಯೋಚನೆಗಳಿಗೆ
ಉಣಬಡಿಸಲು ಸೆಳೆತಗಳಿವೆ ನನ್ನೆಲ್ಲ ಘಳಿಗೆಗಳಿವೆ
ಆಟವಾಡಲು ಹಟವ ಮಾಡುವ ನಿನ್ನ ನೆನಪುಗಳಿಗೆ
ಜೊತೆಗೆ ಸಲಿಗೆಗಳಿವೆ ಸನಿಹದ ಸರಸಗಳಿವೆ
ನನ್ನ ಕವನಗಳ ಓದುವ ನಿನ್ನ ಹಂಬಲಗಳಿಗೆ
ಬರೆಯಲು ಹೊರೆಗಳಿಲ್ಲದ ಸಡಗರಗಳಿವೆ, ಬಗೆಯ ಸ್ಪೂರ್ತಿಗಳಿವೆ
ಅರೆಕ್ಷಣ ಕಾಯದ ನಿನ್ನ ಕನಸುಗಳಿಗೆ
ಕದಿಯಲು ಕಾದ ನನ್ನ ಮನವಿದೆ, ಸೇರಲು ನಿನ್ನ ಮನೆಯಿದೆ
ಸರಳವಾಗಿ ಹರಿವ ಝರಿಯಂತಿರುವ ನಿನ್ನ ನಡೆಗಳಿಗೆ
ತಲೆದೂಗಿ ಬಾಗುವ ಸಂಯಮಗಳಿವೆ, ನಮಿಸುವ ನಮ್ರತೆಗಳಿವೆ
ಹಾಡುವ, ಜೊತೆಯ ಬೇಡಿ ಕಾಡುವ ನಿನ್ನಾಸೆಗಳಿಗೆ
ದನಿಗೂಡಿಸುವ ಸಂತಸಗಳಿವೆ, ಬೆರೆಯಲು ಕರೆಗಳಿವೆ
ಅವಿಸ್ಮರಣೀಯ ಅನುಭವದ ನಿನ್ನ ಅಪ್ಪುಗೆಗಳಿಗೆ
ಮೃದು ಮಲ್ಲಿಗೆಯ ಮುತ್ತುಗಳ ಮಡಿಲಿದೆ, ಒಡಲಲಿ ಹೆಚ್ಚುವ ಮತ್ತುಗಳಿವೆ
ತೊರೆಯಲಾಗದ ನಿನ್ನ ಜೊತೆಗಳಿಗೆ
ಹೃದಯದಲ್ಲಿ ಚಿರಕಾಲ ಅಂಟಿಕೊಂಡ ಪ್ರೇಮದ ಕಲೆಗಳಿವೆ, ಅಲ್ಲಿ ನಿನಗಾಗಿ ನನ್ನ ಜೀವನ ಕಲೆ ಕಾದಿದೆ
--ಕವೆಂಪ
