ನಿನ್ನೊಲವಿನೆಡೆಗೆ

ಸನಿಹದ ಸವಿಯ ಮಧುರ ಕ್ಷಣಗಳ ನೆನಪಿಸಿಕೊಂಡಾಗ ಆಸೆ ಕನಸುಗಳಿಂದ ಸಂಗಾತಿಯ ಒಲವಿನ ಆಸರೆಯಲ್ಲಿ ಸೇರಬೇಕೆಂದು ತುಡಿಯುವ ಮನಸಿನ  ಕನವರಿಕೆಗಳು ಹರಿದಿವೆ ಭೋರ್ಗರೆದು !


ನಿನ್ನೊಲವಿನೆಡೆಗೆ
----------------

ಕ್ಷಣ ಕ್ಷಣಗಳು ಮಧುರ
ಆ ನಿನ್ನ ಸನಿಹ ಸುಖದ ನೆನಪುಗಳು
ತನು ಮನಗಳ ಕಣ ಕಣಗಳಲ್ಲಿ
ಅಮರವಾಗಿ ನೆಲೆಸಿಹವು

ಹರಿವ ನೆತ್ತರಿಗೂ ತಿಳಿದಿದೆ
ನಿನ್ನ ಹೆಸರು, ಉಸಿರಾಡಿದಾಗಲೆಲ್ಲ
ಹೆಚ್ಚುತ್ತಿವೆ ನಿನ್ನೊಲವಿನ ಬಡಿತಗಳು

ಪ್ರವಾಹವೇ ಉಕ್ಕುತ್ತಿದೆ
ಭೋರ್ಗರೆದು ಕರೆಯುತ್ತಿವೆ
ಕನವರಿಕೆಗಳ ಹಿತವಾದ ನರಳಿಕೆಗಳಲ್ಲಿ

ಮೌನಗಳಲ್ಲಿ ಬಚ್ಚಿಟ್ಟ ಆಸೆಗಳ
ತರುವೆ ನಾನು ನಿನ್ನೆಡೆಗೆ
ತೆರೆದು ನಿನ್ನ ಎದೆಯ ಗೂಡಲ್ಲಿ
ಬಿಚ್ಚಿಟ್ಟು ನನ್ನ ನಿನ್ನ ಸನಿಹದ ಒಗಟುಗಳ
ಬೆಚ್ಚನೆಯ ಸುಖದ ಭಾವಗಳಲ್ಲಿ
ಕಣ್ಣ ಕದಗಳ ಮುಚ್ಚಿ
ನಿನ್ನಲ್ಲಿ ಒಂದಾಗುವೆ

ನಿನ್ನ ಸನಿಹ

ಸಹಜವಾಗಿ ಒಮ್ಮೆ ಸಂಗಾತಿಯ ಸಂಗದಿಂದ ಮಿಂದ ಪ್ರೇಮಿಯ ಮನಸು ಜಗದ ಎಲ್ಲ ಸುಖಗಳನು ದೂರವಿಟ್ಟು, ಸನಿಹಕ್ಕಾಗಿ ಹಾತೊರೆದು ಸುಂದರ ಕ್ಷಣಗಳನ್ನ ನೆನೆಯುತ್ತಿರಲು ಹರಿದ ಭಾವನದಿಗಳೆಲ್ಲ ಪ್ರೇಮ ಸಾಗರದಲ್ಲಿ ಒಂದಾಗಿವೆ.

ನಿನ್ನ ಸನಿಹ
-----------

ನಿನ್ನ ಸನಿಹದ ಮುಂದೆ
ಜಗವೆಲ್ಲ ಬಾಗಿಹುದು
ಸುಮ್ಮನಿಹವು ಇನ್ನೆಲ್ಲ ಇಹದ ಸುಖಗಳು
ಇದಿರು ನುಡಿಯದೆ ಹಿಂಜರಿದು

ತಂಗಾಳಿ ತಂಪಿನ ಬಗೆಯದು
ನಿನ್ನ ಮೈ ಕಾಂತಿ ಬೆದರಿಸಿ ಬಿಸಿಲನು
ಬಿಗಿದಂತೆ ಕೋಮಲ ಹೂವನು

ಮುಖದಿ ನಿಂತ ನಿನ್ನ ನಗುವು
ಬಳಸುವ ಬಳ್ಳಿಯ ಹಾಗೆ
ಬಯಸಿತ್ತು ಸದಾ ಸಂತಸದ ಮಡಿಲು

ಮಿಂಚಲ್ಲ ನಿನ್ನ ಕಣ್ಣ ಹೊಳಪು
ನೋಟದಲಿ ನೂರು ಕನಸು
ಹೊತ್ತಿಸಿಹುದು ಹೊಸಬೆಳಕು

ಬಿಚ್ಚದೆಯೆ ನಿನ್ನ ತುಟಿಗಳನು
ನುಡಿಸಿದೆ ಬಿಸಿ ಉಸಿರ ಸರಿಗಮಪ
ಕಾಡಿದೆ ಕುಣಿಸಿದೆ ನಲಿಸಿದೆ
ನನ್ನೆದೆಯಲಿ ತಣ್ಣನೆಯ ನಿನ್ನೊಲುಮೆಯ ತಕದಿಮಿತ